(سبەى):
رێكخراوی نەتەوە یەكگرتوەكان نیگەرانی لە بارگرژییەكانی كەركوك و ناوچەكانی دیكە دەردەبڕێت و داواش لە حكومەتی بەغدا دەكات، مافی هاوڵاتیانی مەدەنی بپارێزێت و رێگە بەپێشێلكاریی نەدات.
نوسینگەی رۆژنامەوانیی رێكخراوی نەتەوە یەكگرتوەكان لە بەیاننامەیەكدا ئاماژەی بەوە كردوە، لە چەند رۆژی رابردودا، لە ناوچەكانی دوزخورماتو كەركوك و چەند شوێنێكی دیكە، بەهۆی جموجوڵە سەربازییەكانەوە، چەندین حاڵەتی پێشێلكاریی رویانداوە.
بەیاننامەكە رونیکردوەتەوە؛ لە سنوری قەزای خورماتو ناوچەكانی دیكە، پەلاماری خانوبەری هاوڵاتیانی كورد دراوە و ژمارەیەكی زۆریان لەلایەن هێزە ئەمنییەكانەوە سوتێنراون، ئەوەش پێشێلكردنی مافی هاوڵاتیانی مەدەنییە.
نەتەوە یەكگرتوەكان داوای لە حكومەتی عێراق كردوە، رێگە بەهیچ هێزێكی ئەمنیی و چەكدار نەدات، پێشێلكاریی ئەنجام بدەن، رێوشوێنی پێویستیش لە بەرامبەر پێشێلكارییەكان بگرێتە بەر.