(سبەی):
جەمیل بایک ئاماژە بەوە دەکات ئەمەریکا و روسیا و ئەوروپا دەیانەوێت ناکۆکییەکانیان لەسەر گۆڕەپانی کورد یەکلایی بکەنەوە و دەشڵێت:”بەڵام کورد روبەڕوى لەشکرکێشى تورکیا دەبێتەوە و هیچ رێگەیەکی دیکەی نییە جگە لە سەرکەوتن لە عەفرین”.
جەمیل بایک هاوسەرۆکی کۆما جڤاکی کوردستان (کەجەکە) لە چاوپێکەوتنێکیدا لەگەڵ رۆناهی تیڤی رایگەیاند؛ پەلامارەکانی تورکیا بە ئاگاداریی روسیا و ئەمەریکا بوە و ئەورپاش لە ئاستی بێدەنگ بوە، چونکە ئەو هێزانە ناکۆکن و دەیانەوێت ناکۆکییەکانیان لەسەر گۆڕەپانی کورد چارەسەر بکەن و ئەمە بوەتەوە هۆی کۆمەڵکوژیی کورد لە عەفرین.
بایک دەڵێت: “ئەردۆغان دەیەوێت پەیمانی لۆزان بپارێزت و کورد بە دابەشکراوی و پەراوێزخراوی بمێنێتەوە، بەڵام پشتگیری و هاوسۆزیی کورد لە هەمو پارچەکانی کوردستان و کوردی تاراوگە بۆ عەفرین دەتوانێت پیلانی دوژمنان پوچەڵ بکاتەوە”.
هەروەک لەبارەى پشتیوانییەکانی کورد، بایک وتی: “گەلی باشوری کوردستان سەرەڕای قەیرانەکان بە پەرۆشەوە پشتگیریی گەلی عەفرینی کردو ئەمە جیگەی دەستخۆشییە، بەڵام داوای کردنەوەی دەروازی سێمێلکا بەڕوی گەلی رۆژئاوای کوردستان لە لایەن پەرلەمانەوە بەس نییە و پێویستە لە ئاستێکی گەورەتردا پشتیوانیی رۆژئاوا بکرێت، گەلی ئێمە لە پارچەکانی دیکە پێویستە سەرەڕای ئاستەنگ و سەرکوتەکان پشتیوانیی عەفرین بکات، چونکە بۆ پوچەڵکردنەوەی پیلانی دوژمنان دژی کورد هیچ رێگەیەک نییە جگە لە سەرکەوتن و سەرکەوتنی عەفین سەرکەوتنی کوردە”.
هاوسەرۆکی کەجەکە جەختی کردوەتەوە؛ روسیا و ئەمەریکا و ئەوروپا پاساو بۆ بێدەنگبونیان لە بەرامبەر تورکیا دەهێننەوە کە گۆیا دەیانەوێت روبەڕوی فاشیزم ببنەوە و دواتر کار بۆ گۆڕینی سیاسەتەکانی تورکیا دەکەن، بەڵام ئەمە ناڕاستە و کورد دەکەن قوربانیی ناکۆکییەکانیان.
