(سبەی):
دواى نزیکەى هەفتەیەک لە وەستانى هێرشە ئاسمانییەکان، شەوى رابردو فڕۆکە جەنگیەکانى سوپاى تورکیا چەند دەستیان بە بۆردومانکردنى چەند ناوچەیەکى عەفرین کردەوە و میدیاکانى رۆژئاواى کوردستانیش ئەوە دەخەنەڕو کە ناوەندى شارەکە و خەڵکى مەدەنى کراوەتە ئامانج.
درەنگانى شه‌وى رابردو فڕۆکه جه‌نگییه‌کانى سوپاى تورکیا ناوچه‌کانى شه‌ڕا و شێراوا و بلبل و جندرێس-یان له سنورى عه‌فرین بۆردومان کردوە و چه‌ندین فڕۆکه‌ى دیکەش بۆ کۆکردنەوەى زانیارى به‌سه‌ر ئاسمانى ناوچه‌که‌دا سوڕاونەتەوە.
میدیاکانى رۆژئاوا بڵاویانکردەوە کە فڕۆکه جه‌نگییه‌کانى ناوەندى شارەکە و گه‌ڕه‌که‌کانى ئه‌شره‌فیه و مه‌حمودییه و قیباری عه‌فرینیان بۆردومان کردوە و بەوهۆیەوە چەند هاوڵاتییەکى مەدەنى کە ژن و بەساڵاچوى تێدایە بونەتە قوربانى.
لەلایەکى دیکەوە رۆژنامەى حورییەتى تورکى دوپاتى کردوەتەوە کە فڕۆکە جەنگیەکانى ئەو وڵاتە دوبارە بۆردومانیان دەستپێکردوەتەوە و ئاماژەى بەوەشکردوە ئەوە لەکاتێکدایە لەدواى خستنەوە خوارەوەى فڕۆکەکەى روسیا لەلایەن چەکدارانى ئۆپۆزسیۆنەوە لە سێى ئەم مانگەدا بۆردومانى فڕۆکەکان وەستێنراون.
