(سبەی):
هێزەکانی سوریای دیموکرات (قەسەدە) ئاماری شەڕ و پێکدادانەکانی (24) سەعاتی رابردوی لە عەفرین بڵاوکردەوە و رایگەیاند؛ (53) سەرباز و چەکداری سەر بە سوپای تورکیا کوژراون.
ئێوارەی ئەمڕۆ شەممە، ناوەندی راگەیاندن و چاپەمەنی هێزەکانی سوریای دیموکرات (قەسەدە) لە بەیاننامەیەکدا ئاماژەی بەوەکردوە، سەرباری ئەوەی نەتەوە یەکگرتوەکان بە بڕیارەی ژمارە (4201) ئاگربەستی لە تەواوی خاکی سوریا راگەیاندوە، بەڵام هێرشی سوپای تورکیا و هێزەکانی سەر بەو وڵاتە بۆسەر کانتۆنی عەفرین بەردەوامە.
قەسەدە ئاماژەی بەوەشکردوە، لەماوەی (24) سەعاتی رابردودا هێزەکانیان تونیویانە بەرپەرچی سوپای تورکیا بدەنەوە و بەهۆیەوە (53) سەرباز و چەکداری سەر بە سوپای تورکیا کوژراون کە (30) سەرباز و چەکداریان لە گوندی بادینا بوە.
