(سبەی):
لیژنەی داکۆکیکردن لە مافەکانی ئافرەت لە پەرلەمانی کوردستان لە کۆنگرەیەکی رۆژنامەوانیدا رایگەیاند دۆخی ئافرەتان لە هەرێمی کوردستان و ناوچە دابڕێندراوەکان و ئاوارەکان باش نییە و توندوتیژییەکان زیادی کردوە بۆ گەیاندنى ئەو پەیامەش لەگەڵ کونسوڵى وڵاتان کۆبونەتەوە.
پێش نیوەڕۆى ئەمڕۆ سێشەممە، ئێڤار ئیبراهیم، سەرۆکی لیژی داکۆکیکردن لە مافەکانی ئافرەت بە میدیاکانی راگەیاند؛ لیژنەکەیان لەگەڵ کونسوڵ و نوێنەری وڵاتان لە هەرێم کۆبونەتەوە و لە دۆخی ژنان و ئاوارەکانی هەرێمی کوردستان و ناوچە دابڕێنراوەکان و ژنانى ئێزدى ئاگاداریان کردونەتەوە و داوایان لێکردون کە چاودێریی دۆخی ژنان بکەن.
وتیشی: “داوامان لەو نوێنەر و کونسوڵانەی وڵاتان لە هەرێم کردوە بەدواداچون بۆ دۆسیەی سێ هەزار ژنى ئێزدى بکەن کە بەهۆی داعشەوە بێسەروشوێن بون و چارەنوسیان نادیارە”.
ئیڤار ئیبراهیک ئاماژەی بەوەکرد؛ بەهۆی قەیرانەکانی هەرێمەوە و روداوەکانی (16)ئۆکتۆبەر توندوتیژیی بەرامبەر ئافرەتان لە کوردستان زیادی کردوە.
لاى خۆیەوە کەژاڵ هادی جێگری سەرۆکی لیژنەکە وتى: “نوێنەر و کونسوڵی وڵاتانمان لە دۆخی هەرێم ئاگادار کردوەتەوە و رەخنەیان لە نەناردنی موچە و پشکی هەرێم لە بودجەی عێراقدا گرتوە”، لەگەڵ ئەوەشدا نەیشاردەوە کە کۆمەڵگەی نێودەوڵەتی هەڵوێستیان لە ئاست بڕینی قوتی هاوڵاتیانی هەرێمی کوردستان لاوازە.