(سبەی):
ژمارەی قوربانییەکانی زەمینلەرزەکەی ئێران بەرزدەبێتەوە و بەپێی دواین ئامار زیاتر لە (215) کەس گیانیان لەدەستداوە و دو هەزار و (504) کەسی دیکەش برینداربون.
میدیاکانی ئێران بڵاویانکردەوە، زەمینلەرزەکە زۆربەی پارێزگا کوردنشینەکانی گرتوەتەوە و زۆرینەی قوربانییەکانیش لە شاری قەسری شیرین و سەرپلزەهازو، سەلاسی باوەجانی بوە.
ئاماژە بەوەشکراوە، تادێت ژمارەی قوربانییەکان رو لە زیادبون دەکەن بە جۆرێک تائێستا (215) کەس گیانیان لەدەستداوە و دو هەزار و (504) کەسی دیکەش برینداربون.
جگە لەوەش زیانێکی زۆری ماددی بەر بینا و باڵەخانەکان کەوتوە و سێ رۆژ ماتەمینی گشتیش لە کرماشان راگەیاندراوە.
هاوکات رێکخراوی نەتەوە یەکگرتوەکان هاوخەمی خۆی بۆ قوربانیانی بومەلەرزەکەی عێراق و ئێران دەربڕی و ئامادەیی خۆیشی بۆ پێشکەشکردنی هاوکاری دەربری.
لە هەرێمی کوردستانیش زەمینلەرزەکە لە زۆربەی ناوچەکان هەستی پێکراوە و بەهۆیەوە حەوت هاوڵاتی گیانیان لەدەستداوە و بە دەیانی دیکەش برینداربون، جگە لەوەش بەهۆی بومەلەرزەکەوە، ئەمڕۆ لە پارێزگای سلێمانی پشوی فەرمی راگەیاندرا.
هاوکات وەزیری کشتوکاڵ و سەرچاوە ئاوییەکانی هەرێم رایگەیاند؛ بەهۆی زەمینلەرزەکەوە بەشێک لە بەنداوی دەربەندیخان زیانی بەرکەوتوە و تیمیان رەوانەی بەنداوەکە کردوە.
بەپێی بەیاننامەی ناوەندی جیۆلۆجی ئەمەریکا، سەنتەری بومەلەرزەکە لە نێوان هەردو پارێزگای کرماشان و هەڵەبجەدا بوە و گوڕەکەشی لە نێوان (7) بۆ (7.6) پلەدا بوە بە پێوەری رێختەر.