پەروا عەلی
ئەوەی جێگای تێڕامانە هەندێ لەو چالاکیانەی لەهەڵمەتی بەرەنگار بونەوەی توندوتیژی دژ بە ژنان ئەنجام دەدرێت، بەسەرپەرشتی سەرۆکی حکومەتی هەرێمی کوردستان بەڕێوەدەچێت، زۆرجار وەک نەرێتیک وتاریش پێشکەش دەکات، لەراستیدا هۆکاری سەرەکی هەمو توندوتیژیەکان سەرۆکایەتی حکومەتی هەرێم خۆیەتی، سەیرە لەهەڵمەتێکی وادا سەرپەرشتی بکات.
چەندین ساڵە لەم هەرێمە ناوازەیەی ئێمەدا جۆرەها چالاکی و کەمپەین ئەنجام ئەدرێ بۆ روبەڕوبونەوەی توندوتیژی دژ بە ژنان، جگە لە رێکخراوەکانی کۆمەڵی مەدەنی و رێکخراوەکانی تایبەت بە ژنان کە بەشێوازی جیا بەشداری دەکەن، گروپ و ئەنجومەنەکان و رێکخراوە سێبەرەکانیش بەجیا پارە و کات تەرخان دەکەن بۆ ئەنجامدانی چالاکی لەم هەڵمەتەدا. توندوتیژی چیە کەوا ئێمە دەمانەوێت بەرەنگاری ببینەوە؟ کێ ئەنجامدەری ئەو توندوتیژیانەیە؟
توندوتیژی دژ بە ژنان، دژ بە هەمو تاکەکانی نێو کۆمەڵگا (مناڵ، ژن، پیا و بەساڵاچوان) هەبوە و بەردەوامە لە زۆربەی کۆمەڵگاکانی دنیادا، بە میکانزمی جیاوازو لە کات و شوێنی جیاواز. ئەوەی باوە زۆر بە دیاریکراوی توندوتیژی جەستەیی و دەرونیە کە لەلایەن پیاوانی خێزان یا کۆمەڵگاوە دەکرێت بەرامبەر بە ژنانی نێو خێزان و دەرەوەی، جا لەهەر دامەزراوەیەکدا بێت، مومارەسەی دەسەڵاتە بەرامبەر بێ دەسەڵات.
ئەوکاتەی هەوڵ دەدرێت بۆ بنەبڕکردنی یا سنوردارکردنی ئەم دیاردەیە، پەنا دەبرێت بۆ یاسا و سزاکانی دەرهەق بە بکەرانی، یا هۆشیارکردنەوەی کۆمەڵگا و کۆکردنەوەی رای گشتی بۆ پشتیوانی لەو پرسە. ئەی ئەگەر بکەرانی ببنە سەرپەرشتیار دەبێ چ کارەساتێک بێت!!، ئاخۆ لەم هەرێمەی ئێمە حکومەت هاوکار بوبێت بۆ کەمکردنەوەی توندوتیژی دژبە ژنان؟ ئایا کەم بۆتەوە یا تەواوی چین و توێژەکانی تریشی گرتۆتەوە؟
حکومەت دەبێت پلانی ئابوری هەبێت بۆ بوژانەوەی کۆمەڵگا، بۆ کەمکردنەوەی بێکاری بۆ خۆشگوزەرنی هاوڵاتیان، ئەم حکومەتەی ئێمە نەک هەلی کار نادۆزێتەوەو یاسا جێبەجێ ناکات، بەڵکو خۆی تێکدەری باری ئابوری خەڵک و ئارامی کۆمەڵگایە لەڕێگەی جێبەجی نەکردنی یاسا و بەگەڕ نەخستنی تواناکانی بۆ خزمەتی کۆمەڵگا، بەڵکو زیاتر لە پێناو خزمەتی حیزبەکان و توێژێکی باڵادەستی سیاسی دایە، نەک خزمەتی هاوڵاتیان.
ئەوەی کابینەکانی حکومەتی هەرێم بەسەرۆک و جێگرەکانیەوە، بەرامبەر بە ژنان کردویانە هیچ کەس و لایەنێک نەیکردوە، لە دوای راپەڕینەوە تا ئێستا هەزاران ژن کوژراون، مناڵ بێ باوک و ژن بێ هاوسەر و بێلانە بون، قوربانیانی شەڕ و ململانێکانی ئەوان، بە پلەی یەکەم ژنان بون، توندوتیژیەکان جگە لە ژن و مناڵ پیاوان و بەساڵاچوانیشی گرتۆتەوە.
کام جومگەی کۆمەڵگا هەیە توشی دەیان جۆری کێشەو نەهامەتی نەبوبێتەوە، هۆکاری یەکەم و کۆتایی ئەو ڕەوشە حکومەتی هەرێمی کوردستانە (ئەوە باسی حیزب ناکەین).
لەم هەرێمە ناوازەیەی ئێمەدا چەند شەرمە بکەرانی توندوتیژی ببنە سەرقافڵەچی بۆ داکۆکیکردن لە ماف و ئازادییەکان، ئەوەی کرا دەرهەق بە ژنانی کوردستان هەر لێدان و جنێو پێدان نیە، بەڵکو قەیرانە یەک لەدوای یەکەکانی ئەم حکومەتەیە بۆ هاوڵاتیانی، هەرێمیک تا ئێستا نەیتوانیبێت موچە، کارەبا. سوتەمەنی دابینکات، خۆشتن و جلشتن بوبێتە کێشەی سەرەکی خێزانەکان، چۆن توندوتیژی تیا ئەنجام نادرێت!
ژنان چۆن روبەڕوی توندوتیژی نابنەوە کە سەرۆکایەتی ئەم حکومەتە خۆی بەرپرسی سەرەکی قەیران و نەهامەتیەکانە، نەبونی پێداویستیەکان، شەڕ و ماڵ وێرانی، هەراجکردنی خاک، تاڵانکردنی سامان و داهاتی سەرزەوی و ژێر زەوی و ئاسمان، وایکردوە هەموان رقیان لەیەکتری بێت، بۆیە توندوتیژی نێوان تاکەکانی کۆمەڵگا رۆچۆتە نێو قوڵایی ناخی مرۆڤەکانەوە و بەردەوامە لە بەرهەم هێنانەوەی، ئەمەش ڕەنگی داوەتەوە لە نێو هەڵسوکەوتی ئەندامانی خیزان و پەرچەکرداری بە ئاشکرا هەست پێ دەکرێت.
حکومەت بۆخۆی هەمیشە لە تاوەرە بەرزەکانەوە سەیری خەڵک دەکات، لە نێو ئەو تاوەرانەدا هەمو پێداویستیەک دابینکراوە، هەست ناکات لە دامێنی تاوەرەکاندا و لە ماڵە سادەکانی زۆربەی گەڕەکەکاندا، نە توانای دارایی هەیە نە کارەبا نە ئاو نە پارەی بەرباخەڵی مناڵان، لەکۆی ئەم شتانەو لە سایەی ئەم دۆخەدا خۆشەویستیش نەماوە.
سەرۆکی حکومەت، ئێوە ئەزانن کۆمەڵگا لە چ دۆخێکی پڕ توندوتیژیدا ژیان بەسەر دەبات؟ ناترسن ئەم دۆخە بەڕوی حکومەتدا بتەقێتەوەو تەڕ و وشک پێکەوە بسوتێت؟ لێرە لە سایەی ئێوەدا لەم حکومەتە شکستخواردوەدا هیچ شتێک بەهای نەماوە، کوردستان هەموی هەراج کراوە ژیان بۆ هەراج، خۆشەویستی بۆ هەراج و عیشق بۆ هەراج.
هاوڵاتیان تێر بون لە رق، توندوتیژی لە کردار و رەفتاری هەمو هاوڵاتیەکی ئەم هەرێمەدا بەدی دەکرێت کە ئێوە سەرۆکی حکومەتەکەین!
