(سبەی):
حكومه‌تی هه‌رێم باج و رسوماتی دیاری كرد و چه‌ند باجێكی نوێشی سه‌پاند، ده‌شڵێت: هه‌ر هاوڵاتیه‌ك پابه‌ند نه‌بێت سزا ده‌درێت، یاساناسێكیش جەخت دەکاتەوە لەوەی بڕیاره‌كه‌ی حكومه‌ت قه‌ره‌قوشیه و پێشێلكردنێكی تری ده‌ستوری عێراقه له‌لایه‌ن هه‌رێمەوە، به‌ڕێوه‌به‌ری تۆماری كۆمپانیاكانیش له سلێمانی رایدەگەیەنێت؛ زیادكردنی باج نایاساییه و ده‌بو بڕیاری په‌رله‌مان بوایه.
حكومه‌تی هه‌رێمی كوردستان بڕیاری ژماره‌ی (126)ی ساڵی (2017)ی ده‌ركرد، و له رۆژنامه‌ی وه‌قائیعی كوردستانیش به ژماره (219) بڵاوكرایه‌وه، له‌و بڕیاره‌دا حكومه‌تی هه‌رێم باج و رسوماتی دیاریكرد، ژماره‌یه‌ك باجیشی له‌سه‌ر هاوڵاتیان زیادكرد.
ئه‌و باجانه‌ی حكومه‌ت زیادیكردون:
باجی فرێدانی خۆڵ و خاشاك كه مانگانه له سێ هه‌زاره‌وه بۆ (150) هه‌زار دیناره به‌مشێوه‌یه:
- سه‌وزه فرۆشه‌كان له (10) هه‌زاره‌وه بۆ (15) هه‌زار دینار
- ماست فرۆشه‌كان (10) هه‌زار دینار
- عه‌ره‌بانه‌ی سه‌ر شۆسته‌كان (10) هه‌زار دینار
- ترشیات فرۆشه‌كان له (20) هه‌زاره‌وه بۆ (25) هه‌زار دینار
- ئارد فرۆشه‌كان (10) هه‌زار دینار
- ئه‌و شوێنانه‌ی كه حاویه‌یان نیه له (3) هه‌زاره‌وه تا (7) هه‌زار
- دوكانی گه‌س و فه‌لافل له (10) هه‌زاره‌وه بۆ (15) هه‌زار دینار
- ماسی فرۆش و گۆشت فرۆش له (20) هه‌زاره‌وه بۆ (25) هه‌زار دینار
- كارگه و نه‌خۆشخانه ئه‌هلییه‌كان مانگانه (150) هه‌زار دینار
- ره‌سمی هه‌ڵواسینی تابلۆ مانگانه له (20) هه‌زاره‌وه بۆ (125) هه‌زار دیناره:
- تابلۆی یه‌كه‌می سه‌ر شوێنی كاره‌كه (30) هه‌زار دینار ساڵانه بۆ یه‌ك مه‌تر دوجا
- تابلۆی تری سه‌ر بیناكان و ته‌نیشت بیناكان (20) هه‌زار دینار ساڵانه بۆ یه‌ك مه‌تر دوجا
- ره‌سمی ریكلام (125) هه‌زار دینار ساڵانه بۆ یه‌ك مه‌تر دوجا
- تابلۆی كۆمپانیاكان له‌سه‌ر زه‌وی (120) هه‌زار دینار ساڵانه بۆ یه‌ك مه‌تر دوجا
- كرێی گۆڕه‌پانی فرۆشتنی ئاژه‌ڵ (500) بۆ هه‌زار دیناره بۆ هه‌ر سه‌رێك ئاژه‌ڵ
حكومه‌تی هه‌رێم رێنمایی بۆ چه‌ندین باج و رسوماتی تر وه‌ك كرێی قیرتاوكردن و كۆنكرێتی شۆسته و به‌كارهێنانیان ده‌ركردوه.
ئه‌نجومه‌نی وه‌زیران ده‌ڵێت: ئه‌م باجانه به‌رێككه‌وتنی نێوان هه‌ردو وه‌زاره‌تی دارایی و شاره‌وانی دیاریكراون و ئه‌نجومه‌نی وه‌زیران په‌سه‌ندی كردون، هه‌روه‌ها ئه‌نجومه‌نی وه‌زیران هۆشداری داوه‌ته هاوڵاتیان له نه‌دانی باج و ده‌ڵێت به‌پێی یاسای داهاتی شاره‌وانیه‌كان مامه‌ڵه له‌گه‌ڵ سه‌رپێچی كار ده‌كه‌ن.
بەڵام بەوتەی حاكم له‌تیف شێخ مسته‌فا، پسپۆری یاسایی له نوسینێكدا رایگه‌یاندوه “بڕیاره‌كه‌ی حكومه‌ت ده‌رباره‌ی باج قه‌ره‌قوشیه و پێشێلكردنی ده‌ستوری عێراقه به‌و پێیه‌ی له ماده‌ی (28)ی ده‌ستور له‌بڕگه‌ی یه‌ك و دو دا هاتوه نابێت هیچ باجێك یان رسوماتێك بسه‌پێندرێت یان هه‌مواربكرێت یان كۆبكرێته‌وه و ببه‌خشرێت ئه‌گه‌ر به‌یاسا نه‌بێت، ئه‌گه‌ر به‌یاساش ده‌ربچێت نابێت كاریگه‌ری له‌سه‌ر لانی كه‌می پێداویستی ژیان هه‌بێت.
حاكم له‌تیف شێخ مسته‌فا ئاماژەی بەوەشکردوە “ئه‌و بڕیاره‌ی حكومه‌ت و هه‌مو بڕیاره‌كانی پێشوتری هاوشێوه كه به‌یاسا ده‌رچون وه‌ك سه‌پاندنی غه‌راماتی هاتوچۆ، هه‌مویان ناده‌ستورین و پوچه‌ڵن، داواشی له په‌رله‌مانتارانی كورد له ئه‌نجومه‌نی نوێنه‌ران كردوه له دادگای فیدراڵی تانه له‌و بڕیاره بده‌ن و هه‌ڵیوه‌شێننه‌وه، داواشی له‌خه‌ڵك كردوه پابه‌ند نه‌بن به‌و بڕیاره سه‌یر و سه‌مه‌رانه‌وه”.
لای خۆیشییەوە سۆران ئه‌حمه‌د، به‌ڕێوه‌به‌ری تۆماری كۆمپانیاكان له سلێمانی بە (تۆڕی میدیای گۆڕان)ی راگەیاند؛ بڕیاری زیادكردنی باج و كرێی خۆڵ و خاشاك و تابلۆی سه‌ر دوكان نایاساییه و له حاڵه‌تی ده‌ركردنی ئه‌و بڕیاره‌شه‌دا ده‌بو په‌رله‌مانی كوردستان ئه‌و بڕیاره‌ی ده‌ربكردایه.
هاوكات هۆشیار عه‌بدوڵا ئه‌ندامی ئه‌نجومه‌نی نوێنه‌رانی عێراق رایگه‌یاند؛ زیادكردنی باج له‌سه‌ر هاوڵاتیانی هه‌رێم له‌لایه‌ن ئه‌م كابینه شكستخواردوه‌ی هه‌رێمه‌وه به‌شێوه‌یه‌كی نایاسایی درێژه‌دانه به سیاسه‌تی برسیكردنی خه‌ڵك.
ئاماژەی بەوەشکرد، پارتی و یه‌كێتی دوای ریفراندۆم له‌لایه‌ن حكومه‌تی ئیتحادیه‌وه تا دێت سه‌رچاوه‌كانی تاڵانكردنی داهاتیان له نه‌وت و گومرگ و فرۆكه‌خانه‌كان لێكه‌م ده‌كرێته‌وه، ده‌یانه‌وێت له‌سه‌ر حسابی گیرفانی خه‌ڵك به‌ناوی باجه‌وه پاره بۆ خۆیان و حزبه‌كانیان په‌یدا بكه‌ن، ده‌شڵێت: خه‌ڵكی كوردستان ئێستا پێویسته پاره‌یان بۆ دابینبكرێت نه‌ك لێیان بسه‌ندرێت به‌ناوی زیادكردن و رێكخستنی باجه‌وه.
