(سبەی):
بەهۆی جێبەجێنەکردنی داواکاری و پێشنیارەکانی کورد لە بودجەدا، فراکسیۆنە کوردستانییەکان بایکۆتی دانیشتنی ئەمڕۆی پەرلەمانی عێراقیان کرد، سەلیم جبوریش دەڵێت: پرۆژە یاسای بودجە ئامادەیە بۆ خوێندنەوەی دوەم.
کاوە محەمەد، ئەندامی ئەنجومەنی نوێنەرانی عێراق لە فراکسیۆنی گۆڕان بە (سبەی) راگەیاند؛ بەهۆی ئەوەی هیچ کام لە داواکاری و پێشنیارەکانی کورد لە پرۆژە بودجەدا جێگەی نەکراوەتەوە، سەرباری ئەوەی دو جار لەگەڵ سەرۆک وەزیرانی عێراق کۆبونەتەوە، بۆیە بڕیاریاندا بە بایکۆت کردنی دانیشتنی ئەمڕۆی پەرلەمان.
وتیشی: پرۆژە یاسای بودجە لە بەرنامەی کاری ئەمڕۆدا نییە، بەڵام پێ دەچێت ئەگەر نیسابی یاسایی تەواو بکرێت، ئەوا بخرێتە بەرنامەی کارەوە.
کاوە محەمەد جەختیکردەوە کە جۆرە رێککەوتنێک هەیە لە نێوان شیعە و سوننە بۆ تێپەڕاندنی بودجەی ئەمساڵ بەبێ کورد.
ئاماژەی بەوەشکرد، ئەوان وەکو فراکسیۆنە کوردستانییەکان بەشداری هیچ کۆبونەوەیەکی پەرلەمان ناکەن، تا ئەوکاتەی ئەو داواکاری و پێشنیارانەی لە بودجەدا پەیوەستە بە کوردەوە، جێبەجێ دەکرێت.
لەلایەکی دیکەوە سەلیم جبوری، سەرۆکی ئەنجومەنی نوێنەرانی عێراق رایگەیاند؛ کە پرۆژە یاسای بودجەی ئەمساڵ ئامادەیە بۆ ئەوەی خوێندنەوەی دوەمی بۆ بکرێت.
