(سبەى):
عێراق و سعودیە لەسەر دامەزراندنی ئەنجومەنی هەماهەنگی نێوان هەردو وڵات رێككەوتن.
لە وتارێكدا كە لەیەكەمین كۆبونەوەی ئەو ئەنجومەنەدا پێشكەشكی كرد، حەیدەر عەبادی سەرۆك وەزیرانی عێراق رایگەیاند، ئەنجومەنەکە بەرهەمی نیەت پاكی و هەوڵی بەردەوامی نێوان عێراق و سعودیەیە.
وتیشی: “باوەڕمان بەوە هەیە كە هاوكاری و كاری هاوبەشی و بەرژەوەندی هاوبەش، خواستی هەردو گەلی عێراقی و سعودی بەدی دەهێنێت لە بوارەكانی ئاسایش و سەقامگیری و گەشەپێدان و بازرگانی و ئابوری”.
هەر لەوبارەیەوە، سەلمان بن عەبدولعەزیز پاشای سعودیە رایگەیاند، هەلێكی زێرین لە بەردەم عێراق و سعودیەدایە بۆ بنیاتنانی هاوبەشیەكی كارا و بۆبەدیهێنانی خواستە هاوبەشەكانیان.
هەروەک ڕیكس تیلەرسۆن وەزیری دەرەوەی ئەمەریكاش كە ئامادەی ئەو كۆبونەوەیە بو وتى: “هیوادارین ئەم ئەنجومەنە سەرەتای زنجیرەی رێوشوێنە هاوبەشەكانی عێراق و سعودیە بێـت بۆ بەهێزكردنی پەیوەندییەكانی نێوانیان”.