(سبەى):
مامۆستایانی ناڕازی هەڵەبجە رایدەگەیەنن؛ گوزەران و لایەنی دارایی مامۆستایان خراپە و لەبەرئەوە دەبێت مامۆستایان لە هەفتەیەكدا تەنها دو رۆژ دەوام بكەن.
دەستەی داكۆكی مامۆستایانی ناڕازی هەڵەبجە لە بەیاننامەیەكدا داوا لە پەروەردەی هەڵەبجەی شەهید و سەیدسادق و پێنجوێن دەكات، دەوامی مامۆستایان لە هەفتەیەكدا بكرێتە دو رۆژ و ئەو مامۆستایانەی لە دەرەوەی شارەكانیشن وانە وتنەوەیان هەر بۆ دو رۆژ رێكبخرێت لە هەفتەیەكدا.
ئاماژەیان بەوەشكردوە؛ تا ئێستا حكومەتی هەرێم لە بەرامبەر دەنگی مامۆستایان و هاتنە سەر شەقامیان خەمسارد و بێ باكە، هێشتا بڕیاری پێدانی شایستە داراییەكانی مامۆستایانی نەداوە.
هەروەک مامۆستایان رەخنەی توند لە حكومەتی هەرێم دەگرن كە كاتی پێدانی موچەكانیان كردوەتە (45) رۆژ، سەرەڕای ئەوەی موچەكانیشیان بوە بە چارەكە موچە.