(سبەى):
سەرۆكی پەرلەمانی كوردستان رایدەگەیەنێت؛ شەڕ چارەسەری كێشەكانی نێوان هەولێر و بەغدا ناكات و ئەوە دەخاتەڕو؛ ئەگەر لەبری بەرژەوەندی كەسی و حیزبی بەرژەوەندی گشتی لەبەرچاو بگیرێت ئەوا چارەسەر ئاسان دەبێت.
د. یوسف محەمەد، سەرۆكی پەرلەمانی كوردستان لە وتارێكدا لە (14)ـەیەمین كۆنفراسی كورد و یەكێتی ئەوروپا لە برۆكسلی پایتەختی بەلجیكا رایگەیاند؛ تیرۆر و كۆچ دەریخست بەرژەوەندی هاوبەش لە نێوان هەرێمی كوردستان و یەكێتی ئەوروپادا هەیە.
وتیشى: “سەقامگیری لە هەرێم بە دیموكراتیزەكردن دێتە كایەوە ئەوەش لە رێگەی سەربەخۆیی دادگاكان و دژایەتیكردنی گەندەڵی و دامەزراندنی دەسەڵاتێكی یاسادانانی بەهێز كە لە ماوەی رابردودا بزوتنەوەی گۆڕان كاری بۆ كردوە”.
لەبارەى کێشەکانى نێوان هەرێم و بەغداشەوە وتى؛ شەڕ چارەسەری كێشەكانی نێوان هەولێر و بەغدا ناكات، ئەگەر لەبری بەرژەوەندی كەسی و حیزبی بەرژەوەندی گشتی لەبەرچاو بگیرێت ئەوا چارەسەر ئاسان دەبێت”.
هەروەک داوایكرد؛ هەرچی زوە بارودۆخی سەربازیی كۆتایی پێبێت بە تایبەت لە كەركوك و خورماتو.
