(سبەى):
خوێندكاران و مامۆستایانی خوێندنگەی ئاوارە عەرەبەكانی سلێمانی دژی بڕیارێكی وەزارەتی پەروەردەی عێراق كە تایبەتە بە داخستنی نوێنەرایەتی وەزارەتی پەروەردەی عێراق لە سلێمانی خۆپیشاندانیان كرد و رایدەگەیەنن ناتوانن بگەڕێنەوە ناوچەكانی خۆیان، لەبەرئەوەی تائێستاش هەڕەشەی تیرۆر لە ناوچەكانیاندا ماوە.
ئەو مامۆستا و خوێندکارانە ئاماژە بەوە دەکەن؛ شارەكانیان خاپوركراون و ئاوەداننەكراونەتەوە و هێشتا هیچ خزمەتگوزارییەك لە شارەكانیان بەردەست نییە، لەبەرئەوە داوا لە وەزارەتی پەروەردەی عێراق دەكەن بڕیارەكەی هەڵبوەشێنێتەوە.
یەکێک لەو خوێندكارانەى ناڕەزایەتى دەردەبڕێت لە بڕیارەکە و بەشداریى خۆپیشاندانەکەى کرد، دەڵێت: “ئێمە داوای ئاسایش و ئارامی دەكەین ئەوە ئێمە گەڕاینەوە بۆ ناوچەكانمان یەكەم شت ماڵەكانمان هەموی وێرانكراوە و هیچ خزمەتگوزارییەك نییە نەتەندروستی نە بینای خوێندن، ئەگەر ئەمن و ئاسایش و خزمەتگوزاریەكانمان بۆدابین بكرێت ئەوا بێگومان دەگەڕێینەوە”.
خوێندکارێکى دیکە بە (تۆڕى میدیاى گۆڕان)ى وت: “بارودۆخ باشنییە لەوێ ناوچەكە ئارامن نییە، بەشێك لە خوێندكارەكان لەوێ ماڵەكانیان روخاوە و ناتوانن جارێكی تر بگەڕێنەوە و خانو دروستبكەنەوە، هەژارن، یەعنی چۆن بگەڕێینەوە”.
مامۆستایەکیش وتى:”ماڵمان نییە، یەعنی بۆ كوێ بگەرێینەوە بچینەوە سەرشەقەماكان؟، خۆمان و مناڵەكانمان لە روی دەرونییە ماندوبوین، لەو هەمو كارەساتەی ئەوێ چۆن بگەڕێینەوە، داواكارین لە وەزیری پەروەردە بۆ چەند ساڵێكی تر لێرە بمانهێڵێتەوە تابزانین بارودۆخی ئەوێ چی لێدێت”.
