(سبەى):
لە دژە هێرشێكدا بۆسەر هێزەكانی سوپای توركیا لە سنوری كانتۆنی عەفرین شەڕڤانانی یەكینەكانی پاراستنی گەل (11) تانك و زرێپۆشی سوپای توركیایان سوتاند و رۆژنامەیەکى لوبنانیش ئاماژە بەوە دەکات کە هێزەكانی توركیا لە عەفرین توانای شەڕكردنیان نەماوە.
رۆژنامەی ئەلدیاری لوبانی بڵاویكردەوە؛ شەڕڤانانی یەپەگە بە موشەكی تاو كە دروستكراوی ئەمەریكایە و تایبەتە بەتێكشكاندنی تانك ئەو دژە هێرشەیان ئەنجامداوە.
بەپێی ئەو هەواڵە؛ جگە لەسوتاندنی ئەو ژمارە تانك و زرێپۆشە، ژمارەیەك سەرباز و ئەفسەری توركیا لەو هێرشەدا كوژراون، جگە لەوەى لە ئەنجامی ئەو هێرشەدا سوپای توركیا توشی شڵەژان بون و لەناوچەكە پاشەكەشیان كردوە.
رۆژنامەکە رونیكردوەتەوە؛ ئەو هێرشە گۆڕانكاریەكی جۆریە لە شێوازی بەرگیركردنی شەڕڤانان لە كانتۆنی عەفرین و پشتبەستن بە چەند سەرچاوەیەك ئەوەی ئاشكراكردوە؛ هێزەكانی سوپای توركیا توانای شەڕكردنیان نەماوە بۆیە توركیا ناچارە پەنابەرێت بۆ هێنانی هێزی سەربازی نوێ بۆ ناوچەكە و هێزە تێكشكاوەكەی ئێستای لە عەفرین پاشەكشە پێبكات.