(سبەی):
دەستەی بومەلەرزەزانی عێراق ئاشکرای کرد؛ زنجیرەیەک بومەلەرزەی یەک لەدوای یەک ناوچەکانی خانەقین و جەلەولای هەژاند.
دەستەی تۆماری بومەلەرزەی سەر بە کەشناسی عێراق رایگەیاند: بەرەبەیانی ئەمڕۆ پێنجشەممە، سێ بومەلەرزە خانەقین و ناوچەکانی دیکەی پارێزگای دیالەی هەژاندوە، بەهۆی کەمی گوڕەکانیانەوە هیچ زیانێکیان لێنەکەوتەوەتەوە.
بەپێی راگەیەندراوەکە؛ یەکەم بومەلەرزە سەعات (2:50)ی بەرەبانی ئەمڕۆ بەگوڕی (2.8) پلە بەپێی پێوەری رێختەر تۆمارکراوە و بومەلەرزەی دوەم سەعات (3:15)ی بەرەبەیان بەگوڕی (3.4) پلە لە دوری دو کیلۆمەتر لە باشوری رۆژهەڵاتی قەزای خانەقین رویداوە و هاوڵاتیان هەستیان پێکردوە. بومەلەرزەی سێیەم سەعات (4:09)ی بەیانی و بەگوڕی (2.2) پلە بوە.
دەستەی بومەلەرزەزانی ئاشکرای کردوە؛ بەهۆی ئەو زنجیرە بومەلەرزەیەوە هیچ زیانێکی مادی و گیانی لێنەکەوتەوە، هەروەک داوای لە هاوڵاتیان کردوە پابەندی رێنماییەکانی تایبەت بە بومەلەرزەبن و گوێ بە دەنگۆ و واتەواتەی ناو خەڵکی نەدەن.
لە کۆتایی ساڵی رابردوەوە زنجیرەیەک بومەلەرزە هەرێمی کوردستان و ناوچەکانی دیکەی باکوری عێراق و رۆژهەڵاتی کوردستانی گرتوەتەوە، جگە لە یەکەم بومەلەرزە کە زیانی زۆری بە قەزای دەربەندیخان گەیاند ئەوانی دیکە بێزیان بون.