(سبەی):
دادگای قورسی ئامەد سزای زیندانی کردنی دو ساڵ و شەش مانگی بەسەر دیلەک ئۆجالان، پەرلەمانتاری هەدەپەدا سەپاند.
بە تۆمەتی بانگەشەکردن بۆ پەکەکە و کەجەکە، لقی پێنجەمی دادگای سزا قورسەکانی ئامەد، سزای دو ساڵ و شەش مانگ زیندانی کردنی بۆ دیلەک ئۆجالان پەرلەمانتاری شاری رۆحای پارتی دیموکراتی گەلان (هەدەپە) دەرکرد.
لەدانیشتنی دادگایی کردنەکەدا کە لەسەر دۆسییەی هەریەک لە دیلەک ئۆجالان و عوسمان بایدەمیر بەڕێوەچو، تۆمەتی ئەوەیان درایە پاڵ کە لە مەراسیمی بەخاکسپاردنی تەرمێکدا لە وێرانشار پڕوپاگەندەیان بۆ ریکخراێکی قدەدەخەکراو کردوە.
پارێزەرانی ئۆجالان، رایانگەیاند: بەشێک لە قسەکانی دیلەک ئۆجالان بڕاون و بە هەڵە نوسراونەتەوە و داوایانکرد کە لەلایەن وەرگێڕێکی کوردی بێ‌لایەنەوە جارێکی دیکە بنوسرێتەوە.
لەبەرامبەردا، دەستەی دادوەران، داواکاری پارێزەرانی ئۆجالانیان رەتکردەوە و سزای دوساڵ و شەش مانگ زیندانیکردنی بەسەر دیلەک ئۆجالاندا سەپاند.
دیلەک ئۆجەلان لە سێی ئۆکتۆبەری ساڵی (1987) لە رۆحا لە دایک بوە و لە هەڵبژاردنە پەرلەمانییەکەی ساڵی (2015) وەک بچوکترین پەرلەمانتاری تورکیا لەسەر لیستی پارتی دیموکراتی گەلان (هەدەپە) و نوێنەری شاری رۆحا، سوێندی یاسایی خوارد و لەگەڵ بەتەمەنترین پەرلەمانتاری ئەو خولە سەرۆکایەتی یەکەم دانیشتنی پەرلەمانی تورکیای کرد.
دیلەک دەرچوی بەشی گەشتوگوزارە لە زانکۆی مێرسین و بۆ ماوەی چوار ساڵ وەک راوێژکاری شارەوانی باگلار لە ئامەد کاری کردوە، کچی فاتیمەی خوشکی عەبدوڵا ئۆجالانی رێبەری زیندانی کراوی پارتی کرێکارانی کوردستانە.
