(سبەی):
روانگەی سوری ئاشکرای کرد؛ سوپای تورکیا رۆژێکی خوێناوی لە عەفرین بەرێکردوە و تەنها ئەمڕۆ زیاتر لە (15) سەربازی کوژراوە.
روانگەی سوری بۆ مافەمانی مرۆڤ، بڵاوی کردەوە؛ ئەمڕۆ هەینی رۆژێکی خوێناوی بو بۆ سوپای تورکیا و میلیشیاکانی سوپای ئازادی سەر بەو وڵاتە و لە شەڕو پێکدادانەکاندا زیاتر لە (15) سەربازی تورکیا لەنزیک ناحیەی راجۆی عەفرین کوژراون.
ئاماژەی بەوەکردوە؛ سەرجەم کوژراوەکانی بەهۆی دژە هێرشەکانی شەڕڤانانی یەپەگە و یەپەژەوە بوە، کە کردویانەتە سەر هێزەکانی تورکیا و میلیشیاکانی ئۆپەراسیۆنی چڵەزەیتون.
روانگەی سوری ئاشکرای کردوە؛ سەرەڕای ئەو ژمارە کوژراوە، ژمارەیەکی زیاتری سەربازی تورکیا برینداربون و ژمارەیەک تانک و ئۆتۆمبێلی سەربازییان تێکشاوە و هێرشی پێچەوانەی شەڕڤانانی کورد بۆ سەر کۆمەڵگە و بنکە سەربازییەکانی ئەو وڵاتە لە رۆژهەڵات و رۆژئاوای عەفرین بەردەوامە.
ئەوە لەکاتێکدایە دوێنێ پێنجشەممە، سەرۆکایەتی ئەرکانی سوپای تورکیا کوژرانی هەشت سەرباز و برینداربونی (13)ی دیکەی لە عەفرین راگەیاند.
لە رۆژی (20)ی مانگی کانونی دوەمەوە سوپای تورکیا ئۆپەراسیۆنێکی بەناوی چڵەزەیتون بۆ پەلاماردانی کانتۆنی عەفرینی رۆژئاوای کوردستان بە پشتیوانی میلیشیاکانی سوپای ئازاد راگەیاندوە و لەماوەی (41) رۆژی رابردودا زیانێکی زۆری بەرکەوتەوە و دەیان دەبابە و تانک و زرێپۆش و ئۆتۆمبێلی سەربازی تێکشکاوە و زیانێکی گیانی زۆریشی بەرکەوتوە.
