(سبەی):
بەرپرسانی عێراق و پێشمەرگە نەگەیشتونە رێککەوتن و دۆخی ناوچه‌كانی نێوانیان ناجێگیرە و مەترسیی سه‌رهه‌ڵدانی شه‌ڕ و پێكدادان لە ئارادیە.
جه‌بار یاوه‌ر ئه‌مینداری گشتی وه‌زاره‌تی پێشمه‌رگه، ره‌تی كرده‌وه له‌گه‌ڵ به‌رپرسانی عێراق گه‌یشتبێتنه رێككه‌وتن و رایگه‌یاند، دۆخی ناوچه‌كانی ته‌ماسی نێوان هێزی پێشمه‌رگه و هێزه‌كانی عێراق ناجێگیر و ئه‌گه‌ری سه‌رهه‌ڵدانی شه‌ڕ و پێكدادان هه‌یه له‌هه‌ر ساتێكدا.
یاوه‌ر له چاوپێكه‌وتنێكیدا له‌گه‌ڵ رۆژنامه‌ی شه‌رقولئه‌وسه‌ت رایگه‌یاندوه؛ حكومه‌تی عێراق مه‌رجی زۆره ملێی هه‌یه و ده‌یه‌وێت به‌سه‌ر لایه‌نی كوردیدا بیسه‌پینێت.
ئاماژەی بەوەکردوە کە هیچ رێككه‌وتنێك له نێوان هیزی پێشمه‌رگه و هێزه‌كانی عێراقدا نیه، هه‌مو ئه‌و ناوچه‌یەی كه له‌لایه‌ن هێزه‌كانی عێراقه‌وه كۆنترۆڵكراون شه‌ڕو پێكدادان تێیدا رویداوه، به‌ڵگه‌ی ئه‌وه‌ش بونی زیاتر له (40)شه‌هید و (156) برینداره له شه‌ڕه‌كانی كه‌ركوك و دبس و پردێ.
سه‌باره‌ت به گرژییه‌كانی نزیك ده‌روازه‌ی فیشخاپور و ئیبراهیم خه‌لیل، جه‌بار یاوه‌ر رایگه‌یاندوه، بڵاوه‌پێكردنی هێزه‌كانی عێراق ، به‌بێ هه‌ماهه‌نگی له‌گه‌ڵ هێزی پێشمه‌رگه، هۆكاری ئه‌و گرژییانه بوه.
