(سبەی):
سەبارەت بە خۆپیشاندان و ناڕەزایەتییەکانی ئەمڕۆی هەرێمی کوردستان، بزوتنەوەی گۆڕان پەیامێکی بڵاوکردەوە کە ئەمە دەقەکەیەتی:
پەیامی بزوتنەوەی گۆڕان سەبارەت بە خۆپیشاندانی شارو شارۆچکەکانی کوردستان
دوای گشت هەوڵەکانمان بۆ پارێزگاریی و چاکسازی و گۆڕانکاری لە حوکمڕانێتی هەرێمی کوردستان بۆ باشکردنی بژێوی ژیانی خەڵک و یەکسانی و دادی کۆمەڵایەتی، لە بەرامبەردا گوێ پێنەدان و رەتکردنەوەو کەمتەرخەمی حیزبە دەسەڵاتدارەکان و بەردەوامیان بە پاوانخوازی و برەودان بە گەندەڵی و پێشێلکردنی هەمو مافە نەتەوەیی و نیشتمانی و دیموکراسیەکانی گەلەکەمان.
ئێستا هەمو پیرۆزیەکان و سەروەری و دەستکەوتەکانی گەلی کوردستان بە ژیانی خەڵک و چارەنوسی نەوەکانی ئایندەشەوە، لەبەردەم مەترسی و هەڕەشەی جدی نەیارو دوژمناندایە، هەر خۆشیان بە کارو کردارو بیرکردنەوەیان بون بە بەشێک لە پرۆژەی شكستپێهێنانی ئەو دەستکەوتانەی کە سەدان ساڵە میلەتەکەمان خەباتی بۆ دەکات.
خۆپیشاندانی هاوڵاتیان بە سەرجەم چین و توێژەکانەوە بۆ گۆڕینی سیستمی حوکمڕانی، بژێوی ژیان، عەدالەتی کۆمەڵایەتی، ئاشتی کۆمەڵایەتی و بەدەستهێنانی مافەکانیان جوڵەیەکی رەوای بێ چەندو چونی خۆیانەو بزوتنەوەی گۆڕان پشتیوانی دەکات.
داواشمان ئەوەیە کە بەشێوازی رێکخراوەیی و شارستانی داوا رەواکانی خۆیان بە دەسەڵاتدارانی هەرێم و دونیای دەرەوە بگەیەنن و دامودەزگاکانی حکومەت و کەرتی تایبەت و بارەگا حیزبیەکان و موڵک و ماڵی هاوڵاتیان پارێزراو بێت، سیمایەکی جوان بە رەوتی خۆپیشاندانەکان ببەخشن.
پەیامی ئێمەش بۆ هێزەکانی پێشمەرگەو ئاسایش و پۆلیسی ناوخۆ ئەوەیە کە پارێزگاری کردن و پشتیوانی کردنی خوشک و براکانیان ئەرکی ئەوانەو لە ئەستۆی ئەواندایە. هەر ئەوەش لەو تێکۆشەرانە چاوەڕوان دەکرێت.
هەر سەرکەوتو بن..
بزوتنەوەی گۆڕان
18/12/2017
