(سبەی):
دوای نزیکەی (15) ساڵ لە روخانی رژێمی پێشو، پەرلەمانی عێراق گفتوگۆ لەسەر گۆڕینی ناوی تەئمیم و گەڕانەوەی ناوی کەرکوک دەکات بۆ پارێزگاکە.
لە کۆبونەوەی ئەمڕۆ شەممەی ئەنجومەنی نوێنەرانی عێراقدا، گفتوگۆکرا لەسەر پرۆژە یاسای گۆڕینی ناوی پارێزگاکانی قادسیە و تەئمیم بۆ دیوانییە و کەرکوک و گەڕانەوەی ناوە رەسەنەکانیان بۆ پارێزگاکان، کە پرۆژەکانی لەلایەن لیژنەی هەرێم و پارێزگاکانەوە ئامادە کرابو.
لیژنەی پەیوەندیدار و نوێنەرانی شارەکە، داوایەکی فەرمی دانیشتوان و ئەنجومەنی پارێزگای کەرکوکیان پێشکەش کرد بۆ گەڕاندنەوەی ناوی رەسەنی کەرکوک بۆ پارێزگاکە و پەرلەمانتارانیش داوایان کرد، پەلەبکرێت لە پەسەندکردنی پرۆژە یاساکان و سڕینەوەی شوێنەواری بڕیارەکانی بەعس و تەعریب لەسەر پارێزگاکان.
لەسەرەتا دەستپێکردنی پرۆسەی تەعریبی شاری کەرکوک لەسەردەستی رژێمی سەدام حسێن، ناوی کەرکوک گۆڕدرا بۆ تەئمیم وەک بەشێک لە پرۆسەی تەعریب و گۆڕینی دیمۆگرافیای شارەکە و دوای نزیکەی (15) ساڵ لە روخانی رژێمی بەعس و بەکارهێنانەوەی ناوی کەرکوک لە بڕیار و یاسا فەرمییەکاندا، بەڵام تائێستا بەپێی یاساکانی پێشو پارێزگاکە ناوی تەئمیمە.