(سبەی):
تیروپشکى دیاریکردنى ژمارەى لیست و هاوپەیمانێتییەکان بۆ هەڵبژاردنى داهاتوى ئەنجومەنى نوێنەرانى عێراق راکێشرا و بزوتنەوەى گۆڕان بە لیستى ژمارە (142) بەشدارى هەڵبژاردنەکە دەکات و لیستى نیشتیمان-یش بە ژمارە (183) بەشدار دەبێت.
پێشنیوەڕۆى ئەمڕۆ سێشەممە لە هۆڵى زەوراى هۆتێل رەشید لە بەغدا بە شێوازى تیروپشک ژمارەى لیست و هاوپیەمانییە بەشدارەکانى هەڵبژاردنى داهاتوى ئەنجومەنى نوێنەرانى عێراق راکێشرا کە نوێنەرى بزوتنەوەى گۆڕان و هاوپەیمانێتى (لیستى نیشتیمان)ى بزوتنەوەى گۆڕان و کۆمەڵى ئیسلامى و هاوپەیمانى بۆ دادپەروەرى و دیموکراسى بەشدارى کرد کە ژمارەکان لەلایەن کۆمسیۆنەوە لەنێوان (101 تا 188) دیاریکراون.
بەپێى ئەنجامى تیروپشکەکە بزوتنەوەى گۆڕان بە لیستى ژمارە (142) بەشدارى هەڵبژاردن دەکات و ليستى نيشتيمان-یش بە ژمارە (183) بەشدارى هەڵبژاردنەکان دەکات.
پێش دەستپێکردنى پرۆسەکەش کۆمسیۆن رایگەیاند کە (25) هاوپەیمانى و (63) قەوارە ناویان تۆمار کردوە و بەشدارى پرۆسەى هەڵبژاردنەکە دەکەن و لەسەرجەم پارێزگاکانیش (6904) کەس لە چوارچێوەى سەرجەم لیست و هاوپەیمانێتیەکاندا خۆیان بۆ هەڵبژاردنەکە کاندید کردوە.
