(سبەى):
هێرش و پەلامارەکانى سەربازان و چەکدارانى سەر بە سوپاى تورکیا و فڕۆکە جەنگیەکانیان بۆ سنورى عەفرین بەرفراوانبوە، لە بەرامبەردا شەڕڤانان لە وەڵامى هێرشەکان بەردەوامن و بەپێى دوایان ئامارى یەپەگە لە چوار رۆژدا (313) چەکدار و سەرباز کوژراون.
ئەمڕۆ هەینى فڕۆکە جەنگیەکانى تورکیا دەستیان بە بۆردومانى سنورى عەفرین کردەوە و چەکدرانى سەر بەو وڵاتەش لە چەند لایەکەوە هەوڵى هەرێشیان دا لەبەرامبەردا شەڕڤانانى یەپەگە و یەپەژە بەرپەرچى هێرشەکانیان داوەتەوە و لە جندرێس و شەرا پێکدادان و شەڕى سەخت لەنیوان هەردولادا رویدا کە تائێستا بەردەوامى هەیە.
ئاژانسى فورات نیوز بڵاوى کردەوە؛ لەماوەى چوار رۆژى رابردودا و لە ئەنجامى بەرپەرچدانەوەى توندى هێرشەکان لە جندرێس و بلبلێ و شەرا لانى کەم (313) چەکدار و سەربازى سوپاى تورکیا کوژراون و تا نیوەڕۆى ئەمڕۆش لە دەوروبەری گوندی بوکێ-ی ناوچەی بلبلێ لە ئەنجامی شەڕێکی سەختدا (١٠) سەربازی سوپای تورکیا کوژراون.
ئەوە لەکاتێکدایە کە نزیکەى (50) رۆژە لەشکرکێشى و شەڕ و پێکدادان و بۆردومان بەردەوامە و وەک ناوەندی راگەیاندنی (هەسەدە) ئاشکراى کرد؛ تا حەوتى ئازار (١٥٨٨) سەرباز وچەکدارى سەر بە سوپای تورکیا کوژراون، هاوکات (٢٨٣) شەڕڤان لە شەڕى بەرگرى لە خاکى عەفرین شەهید بون.
